🚨 હિંમતનગર નજીક પદયાત્રીઓ સાથે ગંભીર અકસ્માત, 5થી 7 લોકો ઈજાગ્રસ્ત; રોષે ભરાયેલા ટોળાએ કાર સળગાવી

દોલગઢ પાટિયા પાસે અંબાજી તરફ જઈ રહેલા પદયાત્રીઓ અકસ્માતની ઝપેટમાં આવ્યા, ઘટના બાદ પોલીસ અને ફાયર બ્રિગેડ ઘટનાસ્થળે પહોંચ્યા

હિંમતનગર:
સાબરકાંઠા જિલ્લાના હિંમતનગર નજીક દોલગઢ પાટિયા પાસે અંબાજી તરફ પગપાળા જઈ રહેલા પદયાત્રીઓ સાથે ગંભીર અકસ્માતની ઘટના સામે આવી છે. અહેવાલો મુજબ, પૂરઝડપે આવેલી સ્કોર્પિયો કાર પદયાત્રીઓની અડફેટે આવી જતા 5થી 7 પદયાત્રીઓ ઈજાગ્રસ્ત થયા હોવાનું સામે આવ્યું છે.

અકસ્માત બાદ કારમાં આગ લગાવવામાં આવી

ઘટના બાદ સ્કોર્પિયો કાર ચાલક સ્થળ પરથી ભાગવાનો પ્રયાસ કરી રહ્યો હોવાની માહિતી સામે આવી હતી. ત્યારબાદ રોષે ભરાયેલા લોકો અને પદયાત્રીઓના ટોળાએ કારને રોકી હતી અને કારને આગ ચાંપી દીધી હતી. ઘટનાના પગલે વિસ્તારમાં ભારે અફરાતફરીનો માહોલ સર્જાયો હતો.

 

 

Instagram પૂરો વીડિયો જુઓ

પોલીસ અને ફાયર બ્રિગેડની ટીમ પહોંચી

ઘટનાની જાણ થતાં પોલીસ કાફલો અને ફાયર બ્રિગેડની ટીમ ઘટનાસ્થળે પહોંચી હતી. કારમાં લાગેલી આગ પર કાબૂ મેળવવાની કામગીરી હાથ ધરવામાં આવી હતી. ઈજાગ્રસ્ત પદયાત્રીઓને સારવાર માટે નજીકની હોસ્પિટલમાં ખસેડવામાં આવ્યા હતા.

પદયાત્રીઓની સુરક્ષા અંગે સવાલો

ભાદરવી પૂનમ દરમિયાન અંબાજી તરફ મોટી સંખ્યામાં પદયાત્રીઓ જતા હોય છે. આ ઘટનાને પગલે હાઈવે પર પદયાત્રીઓની સુરક્ષા અને વાહનવ્યવસ્થાને લઈને પણ સવાલો ઉઠ્યા છે. જોકે, અકસ્માતના ચોક્કસ કારણો અને જવાબદારી અંગે સત્તાવાર તપાસ બાદ વધુ સ્પષ્ટતા થઈ શકે છે.